वीरगञ्ज, भदौ १६ । वीरगञ्ज महानगरपालिकाका मेयर राजेशमान सिंहले वीरगञ्ज बनाउन सबैको साथ र सहयोग अपरिहार्य रहेको बताएका छन् ।
लायन्स क्लब इन्टरनेशनल फाउन्डेसनद्वारा आयोजित मेडिकल सामग्री हस्तान्तरण कार्यक्रमलाई सम्बोधन गर्दै उनले वीरगञ्जलाई समृद्ध बनाउन लायन्स क्लब लगायत सबैको साथ र सहयोग आवश्यक रहेको बताएका हुन् ।
लायन्स क्लबले वीरगञ्ज र यस क्षेत्रमा गरेको कामको प्रशंसा गर्दै उनले आउँदा दिनहरुमा वीरगञ्जको आवश्यकता र यहाँका नागरिकको चाहना बमोजिमका कार्यक्रम सञ्चालन गर्न पनि आग्रह गरे ।
लायन्स क्लबसँग सहकार्य गर्दै महानगर अघि बढ्न तयार रहेको भन्दै मेयर सिंहले महानगरले स्थापना गरेर सञ्चालनको तयारी गरेको वीरगञ्ज जनस्वास्थ्य प्रयोगशालामा केही उपकरणहरू आवश्यक रहेकाले त्यसको व्यवस्था गरिदिन आग्रह गरे ।
लायन्स क्लब इन्टरनेशनल डिष्ट्रिक्ट ३२५ एसका डिष्ट्रिक्ट गभर्नर लायन देवकी नन्दन (डिएन) अग्रवालले शिक्षा र स्वास्थ्यको क्षेत्रमा लायन्स क्लबले काम गर्दै आएको जानकारी दिँदै आफूहरू वीरगंज महानगरसँग सहकार्य गरेर अघि बढ्न सधैँ तयार रहेको बताए । महानगरको प्रयोगशालालाई आवश्यक परेको उपकरण उपलब्ध गराउन लायन्स तत्पर रहेको भन्दै अग्रवालले यसबारे छिट्टै निर्णय लिने पनि बताए ।
क्लबले परवानीपुरस्थित केडिया आँखा अस्पताललाई उपलब्ध गराएको आँखाको रेटिना सम्बन्धी उपचारका लागि अति आवश्यक उपकरण मेयर सिंहले उद्घाटन गरेका हुन् । करिब ८५ लाख रुपैयाँको उपकरण हस्तान्तरण भएको र यो उपकरणले आँखाको रेटिनाको शल्यक्रिया गर्न सहज हुने अस्पतालका सञ्चालक राजेश केडियाले विश्वास व्यक्त गरे ।
अहिले पनि नेपाल भारत लगायत विभिन्न स्थानका आँखाको समस्या भएका विरामीहरूको उपचार गरिरहेको अस्पतालले यो उपकरण पछि अब आँखाको कुनै पनि समस्याको समाधानका लागि बाहिर जानु पर्ने बाध्यता हट्ने उनको विश्वास छ ।
त्यसैगरी लायन्स क्लबले नेपाल मेडिसिटी बयोधा अस्पताल वीरगंजलाई पनि ४ थान हेमा डायलिसिस मेसिन हस्तान्तरण गरेको छ । अस्पतालले मिर्गौला बिरामीहरुकालागि निःशुल्क डायलिसिसको व्यवस्था मिलाएकाले त्यहाँ जाने मिर्गौला बिरामीका लागि सहज होस भनेर आफूहरूले मेसिन उपलब्ध गराएको लायन्स क्लब इन्टरनेशनल डिष्ट्रिक्ट गभर्नर डि.एन.अग्रवालले जानकारी दिए ।
अस्पतालले यस अघिदेखि नै डायलिसिस निःशुल्क गरिरहेको र अहिले लायन्स क्लबबाट प्राप्त डायलिसिस उपकरणबाट पनि थप निःशुल्क सेवा दिन आफूहरूलाई उत्साह थपिएको नेपाल मेडिसिटी बयोधा अस्पतालका उपाध्यक्ष विजय रिमालले बताए ।
हस्तान्तरण कार्यक्रममा लायन्स क्लब इन्टरनेशनल फाउन्डेसनका कोर्डिनेटर एवं पाष्ट मल्टिपल काउन्सिल चेयरपर्सन लायन डा. रमेश अग्रवाल, पुर्व इन्टरनेशनल डाईरेक्टर लायन सञ्जय खेतान, पुर्व डिष्ट्रिक्ट गभर्नर लायन रामअवतार प्रसाद खेतान, नेपाल नेत्र ज्योती संघका केन्द्रिय सदस्य श्याम पोखरेल, फस्ट लेडी लायन सुनिता अग्रवाल, लायन आशा अग्रवाल, क्याबिनेट सेक्रेटरी लायन बासु तिमल्सिना, क्याबिनेट ट्रेजर लायन रामबिहारी पाण्डे, डिष्ट्रिक्ट एक्ज्युकेटिभ चिफ लायन प्रकाश बाहेती, एरिया चिफ लायन उमेश शर्मा, जोन चेयरपर्सन लायन विजय कुशवाहा, एरिया सेक्रेटरी लायन श्याम गुप्ता, लायन पिया सिंह, लायन उमेश साह कानु लगायतको उल्लेख्य सहभागिता रहेको थियो ।
कार्यक्रमको सहजीकरण लायन्स क्लबकी डिष्ट्रिक्ट चिफ लायन विजया ओझैयाले गर्नु भएको थियो ।
-1720629565.jpeg)
-1720629565.jpeg)
